…fjölbreytt atvinnulíf
Ég vil beita mér fyrir því að atvinnulífið þróist í átt að fjölbreytni og tel að varast beri að líta til stóriðjustarfssemi eða annarra allsherjarlausna. Mikilvægt er að hlúa að nýsköpun, tækni og hugviti sem og aðstöðu lítilla eða meðalstórra fyrirtækja. Atvinnulífið verður ennfremur að þróast í sátt við samfélagið og náttúruna og ná að styrkja byggð um land allt.
Huga verður betur að tengslum samfélags og atvinnulífs í sem flestum málaflokkum og gera fólki það kleift að vinna en jafnframt hlúa að fjölskyldu sinni. Til þess þarf fjölskylduvænt starfsumhverfi, sveigjanlegan vinnutíma o.s.frv. Það er að mínu mati forgangsmál að lengja fæðingarorlof foreldra.
Mikilvægt er að fólki séu kynnt réttindi sín á vinnumarkaði og njóti aðstoðar við að leita réttar síns ef á þeim er brotið.
…lýðræði
Lýðræði snýst um svo miklu meira en að fólk fái náðarsamlegast tækifæri til að kjósa á fjögurra ára fresti en þess á milli þess ráði meirihlutinn öllu.
Aðgengi að upplýsingum, rétturinn til að mótmæla, óskert tjáningarfrelsi og fullt félagafrelsi eru forsendur þess að lýðræðislegt samfélag nái að dafna.
Einkavæðing færir völd frá lýðræðislega kjörnum fulltrúm til einkaaðila. Einkavæðing er því í eðli sínu andlýðræðisleg og á alls ekki heima í þeim stofnunum og fyrirtækjum sem sýsla með almannahagsmuni.
…kvenfrelsi
Það er ólíðandi að konur séu enn í dag að berjast fyrir sjálfsögðum réttindum sínum, að konum sé enn mismunað vegna kynferðis síns.
Ég vil samfélag þar sem konur og karlar eru jafnrétthá. Samfélag þar sem enginn kynbundin launamunur er til staðar, ekkert kynbundið ofbeldi. Samfélag þar sem komið er fram við konur sem manneskjur ekki markaðsvörur.
Til þess að draumsýn mín geti orðið að veruleika þurfa karlar að afsala sér þeim forréttindum sem þeir hafa tekið í arf.
…frið og sjálfstæða utanríkisstefnu
Ísland á að móta sér sjálfstæða utanríkisstefnu byggða á félagslegu réttlæti, hlutleysi og friðarstefnu.
Ísland á að sýna gott fordæmi á sviði mannúðarmála og þróunaraðstoðar og einbeita sér að verkefnum sem ekki fylgir herafli eða hermenn.
Ísland á að standa utan hernaðarbandalaga og beita sér fyrir friði.
…öflugt menntakerfi
Menntun er undirstaða framfara, velferðar og öflugs atvinnulífs. Menntun á að vera aðgengileg öllum ekki forréttindi fárra. Nauðsynlegt er að hver einstaklingur geti stundað það nám sem hæfileikar geta og áhugi segja til um óháð efnahag, félagslegum þáttum eða stöðu að öðru leyti, hvort sem um er að ræða nám í leikskóla, grunnskóla, framhaldsskóla, háskóla eða hvers konar tómstundanám.
Ennfremur er nauðsynlegt að efla fjölbreytni í menntakerfinu. Það eru ekki allir sem passa inn í sama staðlaða kassann. Það þarf fjölbreyttar kennsluaðferðir og fjölbreytt nám svo að sem flestir geti fundið eitthvað við sitt hæfi.
Skólagjöld eru ekki ásættanleg. Síauknar álögur á nemendur og foreldra í formi skólagjalda, innritunargjalda eða efniskostnaðar rennir ekki stoðum undir jafnrétti, heldur þvert á móti.
…trúfrelsi
Það er grundvallaratriði að fólki sé ekki mismunað eftir trúhneigð eða trúleysi. Þrátt fyrir allt tal um trúfrelsi og fjölmenningu var á yfirstandandi kjörtímabili samþykkt að starfshættir grunnskóla og leikskóla skuli mótaðir af “kristinni arfleifð íslenskrar menningar”. Þjóðkirkjan hefur nýtt sér þessa tímaskekkju til að stofna til tveggja nýrra embætta og vígt svokallaða skólapresta og skóladjákna til að starfa í grunnskólum landsins. Trúboð í leik- og grunnskólum er gjörsamlega ólíðandi.
Ég tel það réttlætismál að ríki og kirkja verði aðskilin hið fyrsta.
…vernda umhverfi og náttúru
Undanfarin ár hafa samkeppni, hagvöxtur og gróði verið mælikvarði á hvað er gott og hvað slæmt. Náttúran má sín lítils gagnvart slíkum mælikvörðum. Náttúran hefur orðið undir í samkeppni við skammvinnan gróða og aukinn hagvöxt.
Slíkt má ekki líðast! Náttúra Íslands er ein af okkar allra dýrmætustu auðlindum. Hana ber að varðveita og umgangast af virðingu.
Hér getur hið opinbera sýnt gott fordæmi með eigin umhverfisstefnu, fræðslu, hlunnindum eða sköttum. Það er augljós krafa að stjórnvöld komi því svo við að það kosti að menga en það borgi sig að vera umhverfisvæn(n).
Það er mikilvægt að Ísland verði leiðandi í umræðu um umhverfi og náttúruvernd á alþjóðavettvangi og leiði slíkt starf með góðu fordæmi. Stjórnvöld eiga að lýsa vanþóknun sinni á að lönd eins og Bandaríkin neiti að setjast að samningaborðinu til að vinna gegn alþjóðlegri umhverfisvá.
…velferð og félagslegt réttlæti
Fátækt og heimilisleysi eiga ekki að þekkjast og vera viðurkennd staðreynd á Íslandi. Við eigum að geta séð til þess að allir lifi mann- og kvensæmandi lífi og hafi þak yfir höfuðið.
Ég geri kröfu um fullt jafnrétti til opinberrar þjónustu og fullt jafnrétti til náms. Mikilvægt er að styrkja stöðu landsbyggðarinnar hvað þetta varðar. Öflugri byggðarstefnu verður ekki náð fram með einkavæðingu og einkarekstri. Ég hafna öllum hugmyndum um slíkt í undirstöðuþáttum velferðarkerfisins. Meginstoðir velferðarkerfisins eiga að heyra beint undir ríki og sveitarfélög.
Ég vil nýta skattkerfið til að fjármagna öflugt velferðarsamfélag þar sem engum er mismunað og enginn verður útundan. Til að svo megi vera er nauðsynlegt að setja markaðsöflunum skorður, tryggja réttláta tekjuskiptingu og lýðræðislega stjórnarhætti. Ennfremur er nauðsynlegt að tryggja að 40 stunda vinnuvika dugi til eðlilegrar framfærslu.
…Ísland fyrir alla
Okkur ber að taka vel á móti því fólki sem kemur hingað til lands. Það er hins vegar augljóst að innflytjendur þurfa mikinn stuðning til að fóta sig í íslensku samfélagi og verða fullgildir þátttakendur í þjóðfélaginu.
Forsenda þess að innflytjendur geti orðið fullgildir þátttakendur er sú að þeim sé boðið upp á íslenskukennslu þeim að kostnaðarlausu. Slík kennsla ætti helst að fara fram á vinnutíma. Einnig er mikilvægt að gera útlendingum það kleift að varðveita uppruna sinn, menningu og tungumál. Slíkt er einungis hægt með því að stórbæta aðgang barna af erlendum uppruna að kennslu í móðurmáli sínu sem og menningartengda kennslu.
Mikið er af vannýttum hæfileikum meðal innflytjenda. Ég tel það því forgangsmál að koma á samræmdu mati á menntun innflytjenda svo að innflytjendur fái starfað við það fag sem þeir eða þær hafa menntað sig til.
