Auður í allra þágu….

Þessa dagana er lítið að gerast hjá okkur mæðgunum. Ég bætti samt við nokkrum myndum í apríl albúmið.

Í gær fór ég með Freyju í sex vikna skoðun og komst að því sem mig grunaði, þ.e. daman stækkar á óhugnalegum hraða og þyngist alveg eftir kúnstarinnar reglum.

Það er samt ótrúlegt hvað þessir læknar geta aldrei verið sammála um nokkurn skapaðan hlut og því meira sem maður umgengst lækna finnst manni snobbið fyrir starfsstéttinni furðulegra. Það er talað um læknisfræði sem vísindagrein en oft á tíðum finnst mér þetta frekar ágiskunarfræði.

Á næstu dögum er planið að blogga eitthvað af viti. Mig grunar að bloggið mitt sé farið að minna óhugnalega mikið á Barnalandssíðu og sé ekki skemmtilegt aflestrar nema fyrir mig og örfáa ættingja.

Í morgun hélt ég stutta kynningu á málstofu um það hvernig ég hugsa lokaritgerðina mína í MPA náminu. Þeir sem þekkja mig vita að ég á það til að fá kvíðaköst dauðans yfir einföldustu framsögum, bara að þær feli í sér ræðuhöld fyrir framan aðra.

Ég mætti því upp í Aðalbyggingu með góðum fyrirvara. Þegar ég kem að stofunni þar sem fyrirlesturinn minn átti að vera var hún læst. Ég náði í einhvern mann sem opnaði hana fyrir mér og fór svo. Ég labba inn í stofuna og sé fljótlega að það er enginn skjávarpi og engin tölva - og ég náttúrulega búin að undirbúa glæsilegt glærushow. Ég næ í húsvörðinn sem fer að finna fyrir mig skjávarpa og tölvu. Á meðan að hann leitar að slíkum græjum fer fólkið að týnast inn. Ég stend eins og illa gerður hlutur fyrir framan töfluna. Þegar húsvörðurinn kemur loks aftur átti hann eftir að tengja öll herlegheitin, sem tók sinn tíma. Þegar því var aflokið kemur í ljós að skjávarpinn er bilaður! Jamm, enn fer maðurinn af stað, í þetta sinn til að finna annan skjávarpa. Að lokum finnst hann, er tengdur og tölvan er sett í gang. Ég stend ennþá eins og illa gerður hlutur, komin með allt of hraða öndun, hjartslátt og farin að svitna af stressi, en allt lítur betur út þegar að græjurnar eru ekki til vandræða. Ég fer því í tölvuna og ætla að tengja mig inn á netpóstinn minn til að ná í glærurnar EN NEI það er ekki internettengin í þessari stofu! jamm og jæja - enginn séns á því að nálgast glærurnar

Eftir allt þetta hætti ég að vera stressuð og fyrirlesturinn gekk glimrandi vel. Það var einfaldlega ekki hægt annað en að hafa húmor fyrir þessu.

Í dag birtist grein eftir Odd Ástráðsson á vef Ungra vinstri-grænna sem hann skýrir R-listinn er tæki ekki óargadýr en í henni fjallar hann um R-listann. Ég hafði sérstaklega gaman af að lesa hana því ég er í stjórn Ungra vinstri-grænna í Reykjavík og þrátt fyrir að umgangast á þeim vettvangi marga ungliða hef ég enn ekki hitt neinn slíkan sem styður Reykjavíkurlistann.

Í greininni hugleiðir hann tilgang og þau tækifæri sem fylgja sameiginlegu félagshyggjuframboði í Reykjavík og virðist þetta fyrst og fremst felast, eins og ég skil greinina, í því að einungis með því móti náum við - þá ásamt hinum tveimur flokkunum - meirihluta. Ætli þetta séu þá rök þeirra sem styðja áframhaldandi tilveru Reykjavíkurlistans - að þátttaka okkar í Reykjavíkurlistanum leiði til þess að við getum stjórnað, haft raunveruleg áhrif í stað þess að vera veik rödd í minnihluta?

Read the rest of this entry »

Það er glæsilegt viðtal við Elías í Stúdentablaðinu í dag. Drengurinn kann svo sannarlega að koma fyrir sig orði. Skopmyndin var samt eiginlega enn betri! “Ef við störfum ekki saman í Stúdentaráði þá geri ég það bara einn”

Fólk hefur verið að kvarta við mig að það vilji fleiri myndir, að ég eigi að vera duglegri við að setja þær inn. Ég hlýði bara eins og góð stelpa og hér eru nýjustu myndirnar.

Er það ekki svolítil bilun að sitja spennt fyrir framan útvarpið rétt fyrir átta að morgni til og vera að bíða eftir útvarpsfréttunum?

Ástæðan er að í morgun vakti fréttamaður frá RÚV okkur og tók viðtal við Frey um ályktunina sem við í RUVG vorum að senda frá okkur. Það er greinilegt að það er ekki sama um hvað er ályktað, svona vekur athygli en ýmis önnur mál eins og aðstæður heimilislausra í Reykjavík kveikja ekki í fréttamönnum. Svoleiðis mál eru ekki sexý!

Og nei sko! þetta var fyrsta frétt.

Og til að fjalla meira um Unga vinstri-græna í Reykjavík þá sá ég í Mogganum að samstjórnarmaður minn, Haraldur, var að brillera á Norðurlandameistaramótinu í skylmingum. Hann vann í tveimur unglingaflokkum, 20 ára og yngri og 16 ára og yngri. Ég nýti því tækifærið til að óska honum til hamingju.

úff.. Leiðarinn í nýútkominni U-beygjunni er eitthvað það fyndnasta sem ég hef lesið. Ekki beinlínis þessi týpíski leiðari sem maður býst við í pólitísku málgagni.

Í dag er mánuður síðan Freyja Sigrún fæddist. Mikið líður tíminn hratt! Mér finnst hún stækka svo óendanlega hratt og keppist því við að njóta þess að hafa hana svona litla og krúttílega. Reyndar er það ekkert alslæmt að tíminn líði þar sem greyið stúlkan er með magakveisu og hún læknast yfirleitt með tímanum.

Stelpan er reyndar fyrirtaks leikari. Þegar við fáum gesti eða bregðum okkur út þá setur hún upp þetta stórkostlega leikrit þar sem hún - aðalpersónan - er fyrirmyndar ungabarn sem gerir ekkert nema sofa og vera sæt. Um leið og aðrir sjá ekki til hættir hún “aktinu” og rýkur upp með óhljóðum. Fólk er farið að halda að við séum geðveik að kvarta undan þessum engli
En í tilefni mánaðar afmælis setti ég inn myndir - SKOÐA HÉR

Mér finnst það vera aðal mottóið hjá heilbrigðisstarfsfólki sem ég hitti þessa dagana að fræða mig um annars vegar kynlíf eftir barnsburð og hins vegar getnaðarvarnir, það hreinlega rigna yfir mig bæklingarnir um þetta efni.

Ég veit eiginlega ekki hvernig á að taka þessu. Er þetta hint um að barnið mitt sé svo fullkomið að ég eigi að fara að stunda kynlíf sem fyrst aftur og búa til annað eintak eða að það sé nú betra að hafa mig á öruggum getnaðarvörnum svo annað eins skrímsli fæðist ekki í bráð?

Í gær skellti ég mér á afmælistónleika Megasar í Austurbæ. Tónleikarnir voru meiriháttar góðir, sérstaklega fyrir hlé, og skemmtilegur andi í salnum. Eftir hlé fannst mér meira af lökum atriðum t.d. fannst mér Ellen Kristjáns hræðileg og ég hef einhverra hluta vegna aldrei verið mikill aðdáandi Jóns Ólafssonar. Bestu atriðin fannst mér án efa 5ta Herdeildin, Trabant og Funkstrasse. Magga Stína var reyndar líka frábær að vanda og Valgeir Guðjóns kom verulega á óvart. Meistarinn sjálfur var fjarri góðu gamni enda upptekinn við að halda upp á afmælið sitt í Danmörku. Það finnst mér húmor, enda sé ég ekki kallinn fyrir mér sitjandi undir hátíðlegu smjaðri sem þessu.

En er það alveg réttmætt að halda upp á sextíu ára afmæli Megasar á þessum degi. Magnús Þór Jónsson fæddist vissulega fyrir þetta mörgum árum en varð Megas nokkuð til fyrr en löngu síðar? Hvað segja þeir sem eru með listamannanafn um það? Á t.d. Stefán afmæli í dag eða # sem varð til fyrir stuttu?