Auður í allra þágu….

Stundum verður maður fyrir vonbrigðum. Fundur VG í fyrradag var ein af þeim stundum. Ég nenni varla að tjá mig nánar um það. Sérstaklega þar sem maður á varla rétt á því að tuða þegar niðurstaðan varð að endingu sú sem ég vildi, fyrir utan eina breytingartillögu eða tvær.

Nú er bara að finna besta kandídatinn fyrir ungliða til að bjóða fram og styðja. Ég er ekki frá því að við á Guðrúnargötunni séum búin að finna okkar.

Ég er annars búin að vera að velta fyrir mér hvernig ég meti hver eigi skilið að vera ofarlega á lista og hljóti því atkvæði mitt. Ég held að niðurstaðan sé sú að það sé nauðsynlegt að viðkomandi sé búin(n) að starfa innan flokksins og hafi staðið sig vel í því. Þoli það ekki þegar fólk er dregið inn af götunni og sett í efsta sætið vegna kjörþokka af einhverju tagi. Mér finnst að fólk verði að hafa unnið fyrir sætinu, hvernig á maður annars að vita hvort að viðkomandi standi undir væntingum?

Í gær fórum við mæðgurnar í bíó. Ójá! Mamma dró okkur í fimmbíó og þó ég hafi verið mjög svo efins hvort maður gæti farið með smábarn í bíó (hef reyndar heyrt að það tíðkist í USA) kom í ljós að Freyju líkar bara mjög vel við Batman. Heyrðist varla múkk í henni allan tímann. En þetta er líka góður tími til að fara með ungabarn í bíó, klukkan fimm á virkum degi, því fyrir utan okkur voru c.a. 7 í salnum. Kannski segir það reyndar meira um gæði myndarinnar…

Til að leggja mitt af mörkum til að auka hlutfall kvenna í stjórnum fyrirtækja/stofnana hef ég beitt áhrifum mínum til að hljóta bitling. Það tókst og í fyrradag sat ég fyrsta fund minn í stjórn Félagsstofnunar Stúdenta. Mér líst bara vel á og býst við skemmtilegu og krefjandi starfi í vetur.

Á meðan að á fundarstandi stóð var Freyja í fyrsta skipti í pössun, var hjá afa sínum upp í Álfheimum, þar sem hún svaf allan tímann. Þar sem þetta gekk svona einstaklega vel hef ég ákveðið að opna biðlista fyrir æstar pössunarpíur/gæja og hef fulla trú á að hann fyllist von bráðar

Í dag tók ég til í eldhúsinu hjá mér. Ég vaknaði fyrir allar aldir og var að til rúmlega fimm í dag … og það í þessu litla eldhúsi. Ég er nú ekki beinlínis þekkt fyrir að vera óð í þrifunum en það er ótrúlega gefandi svona í lok dagsins að labba inn í eldhúsið og sjá hvað allt er hreint og fallegt, allar hillur, örbylgjuofninn og hver einasta flís. Ég meina - eitthvað þarf ég að hafa fyrir stafni til að afsaka það að ég sé ekki að skrifa mastersritgerðina!

Meðan að á þrifunum stóð setti ég á útvarpið og fyrsta stöðin sem ég náði inn var Útvarp Saga. Mikið lifandi skelfingar ósköp er þetta furðulegt útvarpsefni. Í morgunþættinum gerði greyið útvarpsstjórinn ekkert nema að þusa um að henni hefði ekki borist boð, né fréttatilkynning um athöfnina sem fór fram í kirkjugarðinum um helgina og því væri kvenréttindabaráttan greinilega bara háð af lítilli klíku Eftir það tuðaði hún yfir því að hún væri eini útvarpsstjórinn og útvarpseigandinn á Norðurlöndunum og enginn fulltrúi femínista hefði áhuga á að tala við hana. ÆJ! Greyið! En hvað það er nú skrýtið miðað við málflutning hennar.

Já! það er nóg að gera hjá litlu fjölskyldunni á Guðrúnargötunni.

Á föstudaginn var grillveisla fyrir pakkið í Háskólalistanum. Það var mikið stuð, nema helst hjá Frey greyinu sem húkti úti til að verða ellefu að grilla hitt og þetta ofan í liðið. Freyja Sigrún var ekki ósátt við þennan félagsskap enda líður henni yfirleitt best í margmenni og hávaða, sefur aldrei betur.

Svo var náttúrulega 17. júní og litla fjölskyldan tók því röltið niður í bæ. Um kvöldið kíktu svo nokkrir vinir í spil. Óli og Eygló ætluðu að heilla okkur með Hringadróttinssögu-útgáfu af RISK en við Freyr vorum ekki alveg að kaupa þessar reglur þeirra, er nokkuð viss um að þau hafa látið prenta bæklinginn með eigin útgáfu af reglunum. Það er annars frekar spaugilegt að komast að því að austfjarðarútgáfan af RISK sem við höfum spilað undanfarin ár er KOLRÖNG og fjarri upprunalegu útgáfunni. Skamm Fúsi!

Í gær kíktum við svo á gamla karlinn í Álfheimunum og átum pizzu með honum. Og í dag erum við búin að þvælast á kaffihús og út um alla Smáralind þar sem það varð náttúrulega að kaupa nýtt leikfang handa dekurbarninu.

Var að skrifa grein.

Spennandi hlutir að ske hérna á Kommúnunni. Þetta er a.m.k. fallegt hjá þeim strákunum þó að yfirlýsingar um byltingu í íslenskri fjölmiðlun sé ef til vill einum of….

Það er ekki eðlilega fallegt veðrið þessa dagana. Ég hef það samt bara notalegt, er ekkert að rífa mig snemma upp úr rúminu til að njóta þess. Freyja er nefnilega farin að leyfa mér að sofa nánast til hádegis og þar sem mig grunar að það eigi ekki eftir að endast lengi ætla ég að njóta þess meðan að varir. Fyrir sólarofnæmisvandræðagemling eins og mig er það líka fínt að fá nokkra sólargeisla eftir hádegi. Fín afsökun það!

Þú sem veist allt, hvar er Oddi spurði maðurinn sem bankaði á gluggann hjá mér á bílastæðinu beint fyrir framan Odda í morgun. Þetta minnti mig óþægilega mikið á fyrsta skóladaginn minn … say no more

Ég vildi hins vegar að ég hefði vitað meira þegar ég fór og keypti bremsudiskana hjá Bílanaust í dag. Ég leit út eins og staðaltýpan sem menn setja upp af konum þegar talað er um bíla. Ég vissi ekki árgerðina, vélarstærðina né bílnúmerið (skeikaði reyndar bara um eina tölu). ÚFF! mikið var gott að geta hringt í Frey og fengið réttar upplýsingar.

Í nótt svaf Freyja Sigrún í fyrsta skipti heila nótt. Ég var barasta búin að gleyma því hvað það var gott að sofa svona vel og lengi.

Í tilefni tímamótana hef ég nýtt daginn í það að sofa meira. Merkilegt hvað maður getur verið þreyttur.