Auður í allra þágu….

Þá er ég orðin grasekkja aftur. Freyr er farin upp á fjöll að elta kindur og drekka brennivín. Í þetta skipti hélt hann austur á land með Myrkrahöfðingjanum.

Við Freyja ætlum þó ekki að hanga heima og vorkenna okkur það er nefnilega nóg að gera. Í kvöld ætla Drífa og Erla að kíkja á mig og Idolið. Kannski plata ég þær jafnvel í einn leik um heimsyfirráð (RISK). Á morgun er planið að fara að kjósa í Forvali VG í Reykjavík. Erla ætlar svo að passa Freyjuna mína um kvöldið svo ég geti skellt mér á KosningaVöku á Póstbarnum.

Víst að Drífa var ekki komin í eðalklíkuna - Kommúnuna - þegar ég klukkaði alla Kommúnumeðlimina vil ég bjóða hana hjartanlega velkomna í hópinn með klukki. Til þess að gera viðfangsefnið örlítið skemmtilegra geri ég samt þá kröfu að allir fimm punktarnir innihaldi nafnið mitt….

Í von um að þessi snargeðveika kona haldi sig fjarri mér, heimili mínu og barninu mínu hef ég ákveðið að linka á hana.

Þetta var einhver erfiðasta nótt sem ég hef upplifað. Fyrsta nóttin sem ég er með Freyju í svefnþjálfun sem felur í sér að hún eigi að SOFA á nóttinni (sem þýðir að ég myndi sofa líka), ekki bara hanga á brjóstinu á mér og henni líkar það vægast sagt ílla. Ég var búin að sofa í c.a. 2 tíma í heild þegar Freyr kom af djamminu og mikið lifandi skelfingar ósköp öfundaði ég hann.

Í dag er ég samt búin að safna ansi mörgum punktum sem besta eiginkonan. Ég fór á fætur klukkan átta í morgun með skrípinu og leyfði djammaranum að sofa út. Þegar hann kom fram eldaði ég dýrindis þynnkumat og hellti upp á ítalskt kaffi með flóaðri mjólk og alles. Ég passaði mig samt á því að það kæmi skýrt fram að þegar ég færi næst á djammið ætlaðist ég til samskonar meðferðar.

Í vikunni þóttist ég vera voða ljósmyndari og tók sætar myndir af dömunni sem er hægt að sjá hér.

Mikið rosalega líst mér vel á nýja ritstjóra Stúdentablaðsins. Flott blað með innihaldi sem skiptir máli.

Ég var víst klukkuð af Guðný Ebbu. Ætli ég verði ekki að hlýta því hlutskipti og deila með ykkur fimm atriðum um sjálfa mig.

1. Ég heiti Auður Lilja. Lilja er í höfuðið á ömmu minni heitinni, mömmu pabba. Þegar ég spurði mömmu einu sinni hvaðan nafnið Auður kæmi útskýrði hún fyrir mér að ég væri skýrð í höfuðið á uppáhalds kvennhetjunni hennar úr íslenskum bókmenntum Auði djúpúðgu. Mér fannst það töff og fylgdi hefðinni þegar ég skýrði dóttur mína, Freyju Sigrúnu. Sigrún er í höfuðið á ömmu hennar í sveitinni, mömmu Freys, en Freyja í höfuðið á uppáhalds persónu minni úr goðatrúnni.

2. Ég á mikið af ljóðum í skúffu. Þegar ég var c.a. 15 ára samdi ég heila ljóðabók fulla af ljóðum um ástarsorg og gaf ættingjum mínum og vinum í jólagjöf. Ljóðabókin hét STÓR TÁR sem lýsir ef til vill best hugarástandi 15 ára unglings eftir fyrstu ástarsorgina og því hvað ég var mikil dramadrottning. Eitt uppáhalds ljóðið úr bókinni hljóðar svo:

Ég sem eitt lítið ljóð til þín
um ást í hjarta mér
en ást þín aldrei verður mín
og því er ég hér

Nú niður kinnar renna tár
því gráta það ég má
þú veist ekki hvað ég er sár
því þig ég mun aldrei fá

3. Uppáhaldsdrykkurinn minn er bjór. Ég hef farið í marga megrunarkúra, augljóslega með misvarandi árangri sbr. núverandi útlit. Það eina sem ég svindla alltaf á er bjórbindindi.

4. Ég er mjög metnaðargjörn og set miklar kröfur á sjálfa mig. Stundum mætti segja að það sé of mikið af því góða. Ég er t.d. í alvöru fúl yfir því að hafa ekki náð ágætiseinkunn.Ég vinn samt langbest undir pressu en verð hrikalega löt þegar lítið er að gera.

5. Ég hef gaman af pólitík. Lengi vel vildi ég ekki vera flokksbundin . Fannst gott að geta gagnrýnt alla eins og ég vildi. Eftir mikla naflaskoðun ákvað ég þó að ganga í þann flokk sem er næst minni sannfæringu og reyna að hafa áhrif. Ég er nú meðlimur í Vinstri Grænum. Það er fjarri því að ég sé sammála öllu sem fulltrúar flokksins (t.d. á þingi) segja en er nokkuð sátt. Ég hef trú á einstaklingsframtaki, er ef til vill svolítill anarkisti, og starfa sem slík í pólitík. Ég hef því ekki trú á því að ég sé að spila með liði og finnst slíkar hugmyndir sorglegar.

Að endingu vil ég klukka alla á Kommúnunni!

Ég var að hlaða inn myndum af vélinni minni. Hér eru myndir af Freyju Sigrúnu fyrir fjölmarga aðdáendur hennar. Svo eru myndir af H-listadjamminu sem var á Stúdentakjallaranum um daginn. Að lokum eru örfáar myndir af djammi með VG fólki eftir aðalfund Reykjavíkurfélags Ungra vinstri-grænna.

Nú getur fólk hætt að suða.

Í dag er ég búin að hugsa um fallega barnið mitt, brosa til mannsins míns, fara út að skokka, versla helling af útivistarfatnaði fyrir sæta manninn svo hann verði ekki úti í göngunum, ég fór líka með bílinn í skoðun (og hann stóðst hana með prýði) og skrifaði grein á Kommúnuna.

Ég er búin í starfsnáminu. Síðasti dagurinn var á þriðjudaginn og á miðvikudaginn fór ég með alla pappíra og skilaði inn til deildarstjóra framhaldsnáms sem ætlar að koma þessum 15 einingum inn á ferilinn minn.

Nú get ég farið að titla mig með MPA-gráðu…. tja eða a.m.k. ef ég nota hugsunina hans Gísla Marteins. Ég á nú bara ritgerðina eftir og ætla að skrifa hana eftir áramót.

Ég lenti annars í frekar fyndu atriði upp á Nemendaskrá. Ég var búin að sjá í Uglunni að þau námskeið sem ég var skráð í voru eitthvað dúbíus. Ég fór því til elskanna minna upp á nemendaskrá til að segja mig úr námskeiðum. Konan náttúrulega byrjaði að hreita út úr sér “Akkuru geriru það ekki á netinu” og ég sagði henni að ég hreinlega gæti það ekki því ég væri skráð sem útskriftarnemi. Þá sagðist hún “kaupa þá skýringu”. Þegar hún fletti upp á mér í skránni kom í ljós að Háskólinn leggur miklar kröfur á mig. Ég var skráð í MA ritgerð síðasta vor, MPA ritgerð eftir sumarið, MPA ritgerð í Mai 2006 og MPA ritgerð í ágúst 2006. Frekar mikil framleiðni það. Ég útskýrði þá fyrir konunni að ég hefði nú bara í huga að skila einni MPA ritgerð og við fundum henni réttan stað í sameiningu. Þegar ég fór hins vegar fram á að hún skráði mig úr MA ritgerðinn (sem ég á by the way ekki að skrifa þar sem ég er í MPA námi) setti hún upp strangan svip og sagðist ekki geta það. Ég hefði nefnilega átt að skila MA ritgerðinni síðasta vor og fengi því fall í áfanganum. Ég hafði ekki hjarta í mér að fara að rífast við konuna og gekk út með bros á vör. Það er aldrei lognmolla né leiðindi eftir viðskipti við Nemendaskrá.

Ég kíkti á H-lista djamm á Stúdentakjallarann í gærkvöldi. Skemmtunin átti að byrja klukkan átta þannig að ég mætti hálftíma seinna í þeirri fullvissu að þá yrði einhver mættur. En nei, ég sat þar ein innan um verkfræðinema í stuði. Ég reif upp símann minn og hringdi í hina mömmuna, Drífu, sem ég var búin að hafa samband við fyrir nokkru og plata til að kíkja út í öl með mér. Planið var að skilja mennina og börnin eftir heima og hafa það gaman. Um leið og hún svaraði spurði ég hvort hún væri ekki að fara að koma. “Koma hvert?” var svarið. Drífa þjáist ennþá af gullfiskaminni eftir óléttuna. Þegar ég hafði minnt hana á hittinginn okkar fékk ég týpísku mömmu svörin. Hún var úfin með ælu á fötunum, bæði börnin ennþá vakandi, hún átti ekkert hreint til að fara í og meikið hennar var búið. Drífa er samt ógurlegur rokkari og svíkur ekki loforð sín. Hún var því mætt á svæðið einum og hálfum tíma síðar, í hreinum fötum og fagurlega meikuð.

Ég var því ekki ein lengi. Fullt af skemmtilegu fólki mætti á svæðið og Hraun sá um að trylla mannskapinn með smellum eins og Rebellnum, Stuck in the Middle with you og Hi-man.