Auður í allra þágu….

Kæru félagar

Ég heiti Auður Lilja Erlingsdóttir. Ég gef kost á mér í annað sæti í forvalinu sem fer fram á laugardaginn.

Ég fæddist fyrir 27 árum í Uppsölum í Svíþjóð og er því innflytjandi. Mestan hluta ævi minnar hef ég þó búið á Íslandi. Ég hef búið víða um landið, þó lengst af í Borgarnesi. Fyrir einu og hálfu ári varð ég þeirrar gæfu aðnjótandi að verða móðir, en þá eignaðist ég dóttur mína, Freyju Sigrúnu. Ég er gift barnsföður mínum, Frey Rögnvaldssyni. Ég bý í Norðurmýrinni með þeim og þremur köttum. Ég er stúdent frá Fjölbrautarskólanum á Sauðárkróki. Eftir framhaldsskóla flutti ég hingað suður og hóf nám við Háskóla Íslands. Þaðan lauk ég BA prófi vorið 2003 í stjórnmála og atvinnulífsfræði og núna í haust útskrifaðist ég með meistaragráðu í opinberri stjórnsýslu. Í dag starfa ég sem ráðgjafi á einstaklingssviði í Sparisjóði Vélstjóra og er jafnframt formaður Ungra vinstri-grænna.

Ástæðan fyrir því að ég býð mig fram í þessu forvali er einfaldlega sú að ég á mér draum. Ég læt mig dreyma um betra samfélag, finnst margt mega fara betur og hef margar hugmyndir fram að færa til að svo megi verða. Ég býð mig fram vegna þess að ég vil hafa áhrif!

Nú langar mig að segja ykkur frá helstu stefnumálum mínum:

Read the rest of this entry »

Mér bárust nokkrar spennandi spurningar sem ég er búin að glíma við að svara.

Spurning 1:
Hvaða stefnu vilt þú taka í ES/EES málum? Á Ísland að sækja um aðild?

Ég tel að Ísland eigi ekki að sækja um aðild að ESB. Fyrir því eru margar ástæður, þó einna helst þessar tvær:

Í fyrsta lagi tel ég að hagsmunum Íslands sé betur komið í núverandi samstarfi við ESB í gegnum EES samninginn.

Read the rest of this entry »

Valgerður Sverrisdóttir, utanríkisráðherra, sagði við Ríkisútvarpið að betra hefði verið ef formenn ríkisstjórnarflokkanna hefðu haft samráð við utanríkismálanefnd Alþingis þegar þeir ákváðu að styðja hernað Bandaríkjamanna í Írak.

Já, er það ekki!
Þetta er nákvæmlega það sem við sögðum. En einhverra hluta vegna virðist forystufólk Framsóknarflokksins ekki hlusta á almenna skynsemi, vilja þjóðarinnar eða annað nema þegar styttist í kosningar.

Töff nafn á góðum samtökum. Við erum nefnilega að á móti öllum hernaði, ekki bara herstöðvum.

Það fer að líða að kosningum. Á næstu mánuðum er mikilvægt sem aldrei fyrr að náttúruunnendur á Íslandi líti til baka, horfi á aðgerðir stjórnvalda undanfarin ár og kjósi með hagsmuni náttúrunnar í huga.

Viljum við önnur fjögur ár með hægri stjórn við völd á Íslandi? Stjórnvöld sem leggja mat á gæði og virði með hugtökum á borð við samkeppni, hagvöxtur og gróði? Mitt svar er nei! Náttúran má sín lítils gagnvart slíkum mælikvörðum. Ég vil ekki þurfa að eyða næstu fjórum árum í að horfa á náttúruna verða enn og aftur undir í samkeppninni við skammvinnann gróða og aukinn hagvöxt.

Sofandi að feigðarósi

Stærsta vandamálið í náttúruvernd í dag er hugarfar almennings, stjórnenda hins opinbera og eigenda fyrirtækja. Það er kominn tími til að fólk vakni til meðvitundar um það hvernig daglegt líf þess, athafnir og neysla hefur áhrif á náttúruna. Við getum ekki haldið áfram á sömu braut.

Til að almenningur verði meðvitaðri er nauðsynlegt að stórauka fræðslu um náttúru- og umhverfismál. Fræðslan þarf að hefjast þegar í leikskólum og grunnskólum. Börn læra ekki að bera virðingu fyrir umhverfi sínu og náttúrunni nema þeim sé kennt það.

Næsta skref er að hvetja fólk til að taka afstöðu. Það er nefnilega ekki nóg að vilja vel ef samsvarandi hegðun fylgir ekki í kjölfarið. Það er ekki hægt að segjast hafa áhyggjur af loftslagsbreytingum og mengun en halda svo áfram rúntinum á nagladekkjunum á stóra flotta kagganum. Það er ekki nóg að tala um endurvinnslu eða minni neyslu en gera ekkert til að vinna að lausn vandans á heimilinu.

Það er þó engan veginn nóg að almenningur axli ábyrgð á náttúrunni. Stjórnmálamenn, stjórnvöld og stjórnendur fyrirtækja þurfa að axla sinn skerf af ábyrgðinni líka. Það er á ábyrgð stjórnvalda að gera almenningi það kleift að endurvinna og jafnvel um leið að hvetja til þess. Hvernig má það til dæmis vera að opinberar stofnanir séu ekki allar með umhverfisstefnu og endurvinni í það minnsta pappírinn sem notaður er innanhúss? Það er svo margt sem hið opinbera getur gert til að sýna gott fordæmi og stuðla að betra ástandi en í dag virðist einfaldlega viljinn ekki vera til staðar.

Í stað þess að styðja við fjölbreytt atvinnulíf víðs vegar um landið hafa stjórnvöld glatað yfirsýninni og sjá eingöngu færar alsherjarlausnir stóriðjustefnu. Í stað þess að stjórnvöld leggi metnað sinn í að koma á vitrænum umhverfisstöðlum og tryggi að eftir þeim sé farið eru stjórnvöld í dag að hjálpa fyrirtækjum að smeygja sér fram hjá slíkum kröfum. Fyrrverandi forsætisráðherra þjóðarinnar hughreysti til að mynda þjóðina með því að við þyrftum engar áhyggjur að hafa af loftslagsbreytingum og alþjóðlegri samvinnu því við ættum beinlínis inni mengunarkvóta. Þessi stefna er náttúrulega glórulaus hvort sem við horfum til dagsins í dag eða afleiðinganna sem þetta mun hafa á börn okkar og barnabörn.

Ég vil breytingar núna!

Greinin birtist í Morgunblaðinu 25. nóvember 2006

Ég vaknaði full tilhlökkunar í morgun. Ég var nefnilega í fyrsta skipti í langan tíma að fara á stefnumót við karlmann, þ.e. annan en eiginmann minn. Eftir sturtu var andlitið sett á sinn stað og rölt í vinnuna.

Ég var því mjög vonsvikin þegar að yfirmaðurinn minn spurði mig hvort ég gæti sleppt því að fara úr húsi í hádeginu vegna mikillar manneklu. Samviskan bauð mér ekki annað en að verða við tilmælunum og aflýsa stefnumótinu. Maðurinn minn verður ábyggilega vonsvikin líka þegar hann fréttir af þessu. Honum leist nefnilega svo andsk…. vel á fyrirhugað stefnumót þegar honum var tilkynnt það.

- - - - - - - - - - - - - - - - - - - - - - - - - - - - - -

Af öðrum málum er helst frá því að segja að ég er búin að setja inn helstu málefni mín hér á síðuna. Það er að sjálfsögðu ýmislegt sem vantar en þetta er lifandi síða svo örvæntið ekki, hún mun þróast með tíð og tíma.

Á morgun kl. 17:00 verður kjörskrá VG fyrir forvalið á höfuðborgarsvæðinu lokað. Ég mælist því eindregið til þess að þeir sem hafa í hyggju að kjósa skrái sig fyrir þann tíma. Það er hægt hér!

Fundurinn í gær (vinstri græn vs. hægri græn) var mjög góður. Mætingin var mjög góð en fyrst og fremst eru Kata og Illugi einstaklega skemmtileg og frjó. Það er svo sannarlega ekki hægt að saka þau um að vera náttúrulaus.

Það sem mér fannst merkilegast af öllu var þessi umræða um hvernig ætti að nálgast umræðu um umhverfis - og náttúruvernd. Út frá hvaða heimspekilegu nálgun er best að nálgast viðfangsefnið. Fyrir mér þá hefur það alltaf verið augljóst að náttúran hafi gildi í sjálfu sér. Hún er til óháð okkur eða ef til vill er réttara að segja - Náttúran er til þrátt fyrir okkur. Undanfarin ár hefur umræðan þó fyrst og fremst verið út frá nýtingu auðlinda, þ.e. hvernig nýtum við náttúruna sem best. Hvernig gagnast náttúran okkur best?

Gallinn við þessa mannhverfu nálgun er að sjálfsögðu sá að það hefur reynst okkur erfitt að meta náttúruna að verðleikum, skella verðmiða á einstaka svæði, auðlindir eða fegurð. Rökin um að það væri nú allt í lagi að virkja Kárahnjúkasvæðið því það hefði hvort sem er enginn séð það eru gott dæmi um þessa mannhverfu nálgun.

Í kvöld, miðvikudagskvöldið 22. nóvember, býður UVG upp á skemmtilegt spjall um umhverfismál. Katrín Jakobsdóttir og Illugi Gunnarsson munu halda uppi líflegum samræðum um umhverfismál og náttúruvernd þar sem m.a. verður tekið á víddunum hægri og vinstri græn.

Ég hef svolítið exta gaman af þessari auglýsingu því ég frétti að ég hefði verið tekin fyrir á málstofu upp í Háskóla um daginn. Það var fyrir að krefjast þess að fjölmiðlar og flokksmenn tali ætíð um okkur í VG sem Vinstri-græn (þ.e. ekki í karlkyni) en skrifi sjálf á sama tíma grein sem bar heitið Hægri grænir verða dæmdir af verkum sínum. Tilvitnunin “Hægri grænir” var þó tekin beint upp úr grein eftir Illuga Gunnarsson og var ætlað að undirstrika mun á fylkingunum enn frekar. Þau skilaboð hafa augljóslega ekki komist til skila en það er alltaf gott að skrifa konu hljóti athygli.

Í gær fór ég í teiti sem var haldið fyrir Múrpenna og velunnara Múrsins. Þar hitti ég fyrir skáld nokkuð og fjárfesti í nýútgefinni ljóðabók hans - Endurómun upphafsins.

Bókin lofar góðu

Klukkan 11:00 á morgun verður fundur á vegum UVG undir yfirskriftinni - Á Ísland að slíta stjórnmálasamstarfi við Ísrael? Fundurinn verður á Suðurgötu 3, húsnæði VG.

Eftir þann fund fer ég hingað: