Auður í allra þágu….

Hver er hræddur við grimman úlf (sungið skrækri röddu) er viðlagið í nýju teiknimyndinni hennar Freyju um grísina þrjá. Mikið vona ég að hún fái leiði á þessari teiknimynd og taki aftur til við að horfa á Tinna, Lukkuláka og Ástrík. Ég er satt að segja farin að sakna þeirra.

Það er ömurlegt veður úti. Ég elska það! Nágrannar mínir hafa nefnilega undanfarin ár tekið forskot á sæluna hvað varðar flugelda og prófað hinar margvíslegustu gerðir af bombum og flugeldum fleiri fleiri daga fyrir áramót með tilheyrandi hávaða. Í dag hefur engu verið skotið upp. Jahú! í mínum huga er nefnilega einfaldlega bannað að skjóta upp flugeldum fyrr en 12 á miðnætti á gamlárskvöld.

Hvað er annars málið með þetta pakk sem er farið í samkeppni við björgunarsveitirnar í flugeldasölu?

Tanja, ein af fóstrunum á leikskólanum hennar Freyju, spurði Frey furðu lostinn hvar Freyja hefði lært rússnensku um daginn. Samkvæmt henni er Freyja nokkuð lunkinn að heilsa á rússnensku, einhver spes kveðja sem rússar nota þegar þeir eru mjög glaðir að hittast.

Ætli ég verði ekki að þakka bróður mínum sérstaklega fyrir þessa tungumálakunnáttu dóttur minnar. Hann er eins og áður hefur komið fram að læra út í Rússlandi. Þegar hann kom heim síðast gaf hann Freyju dúkku sem heitir Cheburashka og er aðal sögupersónan í rússnenskri teiknimynd. Seinna sendi hann teiknimyndina sjálfa til pabba - á rússnensku - og þetta hefur Freyja dundað sér við að horfa á svaka sátt í hvert skipti sem hún fer í heimsókn til afa og ömmu í Álfheimunum.

Nú þarf ég bara að útvega teiknimyndir á fleiri tungumálum…..

Ætla ekki allir að mæta? Ég er reyndar með góða fjarvistarafsökun. Verð farin í sveitina með Freyjuna mína.

Ég er búin að vera meira og minna heima frá vinnu í tvær vikur núna. Eftir að ganga á milli lækna kom í ljós að ég er með stórt brjósklos. Ég varð eiginlega fegin að fá fréttirnar, að fá úr því skorið af hverju ég er að drepast í bakinu og geta hugsanlega fengið bata. Nú ligg ég spennt alla daga og býð eftir því að taugaskurðlæknirinn hringi og bjóði mér tíma til að kanna hvort ég sé “skurðhæf”. Það er víst ekki sniðugt að fá slæmt brjósklos svona rétt fyrir jólin og því mun ég sennilega bíða þar til um miðjan janúar eftir tíma.

Í millitíðinni fer ég í sjúkraþjálfun nokkrum sinnum í viku og læt toga mig á sérútbúnum togbekk og fæ rafbylgjur. Ég vissi satt að segja ekki að svona tæki og tól væru til nú til dags nema sem pyntingartæki í bíómyndum en ég er hæstaánægð með meðferðina. Finn þó nokkurn mun á sársaukanum eftir hvert skipti verst hvað það varir í skamman tíma.

Ég er búin að vera nokkuð öflug að kanna heilbrigðisgeirann undanfarið. Um daginn þurfi ég að fara á 8 klukkustunda fresti upp á slysadeild og fá pensilín í æð. Ég lenti ótrúlega oft á æðislegri hjúkku sem fannst það einkar viðeigandi að þingmenn kæmu reglulega til að prófa heilbrigðiskerfið á eigin skinni. Ég er að hugsa um að nota það sem afsökun fyrir tíðari heimsóknum til lækna á næstunni.

Þorgerður Katrín, menntmálaráðherra, sagði í svari við fyrirspurn minni um kristilegt siðgæði í grunnskólum að kristni setti mark sitt á skólastarf með ýmsum hætti, ekki einungis í námskrá og lögum, heldur væri einnig gefið frí í skólum á kristnum hátíðum á borð við jól og páska. Hún endaði þann hluta svars síns að segja að hún vonaði að ég teldi það ekki til ama.

Í kjölfarið fór ég að velta þessu fyrir mér með kristna hátíðardaga því í mínum huga tengjast jólin ekki á nokkurn skapaðan hátt kristni hvað þá páskar. Ég hef einfaldlega notið frísins og notið það til að dvelja heima, hitta ættingja og vini og hlaða batteríin.

Eftir örlitla heimildaleit komst ég að því að svo er sem ég hélt, þ.e. næstum allir alþjóðlegir kristnir hátíðisdagar eigi sér einhverjar rætur í eldri veraldlegum hátíðum þar með talið jól, páskar og hvítasunna. Hvítasunnan var upphaflega haldin til að fagna hveitiuppskeru og páskar voru upprunalega hátíð þar sem fæðingu fyrstu lambanna var fagnað. Jólin voru til sem skammdegishátíð löngu fyrir Krists burð og það var ekki fyrr en á 4. öld að farið var að halda upp á fæðingu Jesú krists á gömlum sólhvarfadegi, 25. desember.

Ég amast því svo sannarlega ekki við að frí sé gefið á kristnum hátíðardögum frekar en ég amast við því að frí sé gefið á heiðnum hátíðardögum enda er raunin að slíkar hátíðir fara oftar en ekki saman í dagatalinu. Ég fagna því einfaldlega að fá tíma til að sinna fjölskyldunni minni, vinum og ættingjum.

„Þjóðfélagið okkar er byggt upp á kristilegu siðgæði. Við lifum í mjög friðsömu og umburðarlyndu þjóðfélagi,“ sagði Höskuldur en varaði við „umburðarlyndisfasisma“.

Morgunblaðið laugardaginn 8.desember

Stórsniðugt alveg hreint. Þetta minnir á áherslur rasistanna sem sátu með mér á Norðurlandaráðsþingi æskunnar - að minnihlutinn sé að kúga meirihlutann. Staðreyndinn er reyndar sú að sá veiki fær yfirleitt ekki sínu framgengt hjá hinum sterka nema sá sterki hafi hag af því eða það gangi a.m.k ekki gegn hagsmunum þess sterka.

Fyrir utan almennar pælingar um málefnastöðu þess sem segir svona má ekki líta hjá því að þetta er stórsniðugt orð - UMBURÐARLYNDISFASISMI. Mæli með að hér eftir verði sömuleiðis notað orðið lýðræðiseinræði.