Elías Jón

Stundum er ég of bráður á mér.

Þegar ég kom heim í gær hafði gangstíginn að húsinu fennt fennt í kaf. Ég rauk til, fullur eldmóðs og andúðar á snjó, greip skóflu og hóf að moka stíginn. Ég lauk verkinu á mettíma og var nokkuð ánægður með framtakið. Ég hugsaði með mér að þarna hefði ég skorað nokkur stig fyrir næsta fund í húsfélaginu.

Í látunum áttaði ég mig ekki á því að það var ennþá snjókoma og skafrenningur. Það hefði ég betur gert. Þegar ég leit út um gluggan tveimur tímum eftir moksturinn þá sáust engin merki um framtak mitt. Í morgun þegar ég yfirgaf heimilið hafði svo fennt enn meira í gangstiginn. Þá hafði ég ekki tíma til að moka.

Ég hef nú áhyggjur af því að einhver sé búinn að moka stíginn og tryggja sér þannig formennsku í húsfélaginu. En eins og allir vita þá er ég formennskusjúkur.

Í framhaldi af síðustu færslu þá langar mig að auglýsa til sölu svefnsófann minn. Auk hans býð ég einnig nýlegan fataskáp til sölu.

Nánari upplýsingar fást hjá mér.

Ég verð hreinlega að lýsa því yfir að ég á alveg einstaklega fallegt og notarlegt heimili. Nú þarf bara að fá niðurstöðu úr leiðindamálinu og þá verður þetta fullkomið.

Ég hef einnig komist að því að það er mun betra að sofa í rúmi en svefnsófa.

Það er gleðilegt að sjá að forveri minn í embætti er orðin framkvæmdastýra S.U.S. Ég vona að henni takist að halda aftur af þeirri andfélagslegu stefnu sem fram kom í ályktun samtakana um menntamál á síðasta landsfundi þeirra*. Þar segir meðal annars:

“SUS telur opinbera styrki til menntamála ekki eiga rétt á sér og vilja afnema þá með öllu.”

og

“Ungir sjálfstæðismenn telja vert að háskólastúdentar greiði sjálfir fyrir nám sitt að öllu eða verulegu leyti.“

Henni býður augljóslega mikið og erfitt starf. Ég óska henni alls hins besta við að halda áfram að tryggja hag stúdenta við Háskóla Íslands á nýjum vetvangi. Ég treysti því að hún standi sig betur en ákveðin þingkona Framsóknarflokksins í þeim efnum.

Í gær langaði okkur Guðrúnu Svövu í súpu og lögðum því leið okkar niður í bæ.

Einfalt markmið ferðarinnar átti þó eftir að verða flókið og erfitt að ná. Við þræddum miðborgina frá einum matsölustað til annars. Einu svörin sem við fengum framan af var að það væri ekki súpa á sunnudögum. Ef það var súpa þá var það sveppa, en hún kom ekki til greina.

Að endingu eftir langan, en þó ánægjulegan, göngutúr um miðborina stungum við nefjum okkar inn um dyrnar á Sólon. Umsvifalaust lék yndislegur ylmur blómkálssúpu um nasir okkar. Við eltum því nefin inn og pöntuðum okkur súpu. Bragðið var ekki síðra en lyktin.

Þrátt fyrir að við höfum að endingu náð takmarkinu á Sólon þá verð ég að setja of í við veitingmenn í miðborginni fyrir að selja ekki súpu á sunnudegi. Hvað er betra fyrir viðkvæma maga og þreytt meltingafæri borgarbúa en súpa á sunnudagmorgni? Ég legg til að Gísli Marteinn geri þetta að sínu máli í borginn, súpuleysið er auðvitað R-listanum að kenna, engum öðrum. Gísli, þú ert frelsarinn okkar!

Ég frétti af því að um daginn hefði verið stofnað félagið Vinir einkabílsins. Ég gat ekki annað en brosað þegar ég heyrði þetta og spurði hver stæði fyrir þessu gríni. Mér var tjáð að þetta væri ekki grín. Ég kýs að trúa því ekki.

Eftir smá eftirgrennslan hef ég komist að því að einkabíllinn á sér aðeins 15 vini. Einn þeirra og vinur númer eitt er Eggert Páll Ólason sem stefnir víst á 7. í prófkjöri hjá Sjálfstæðisflokknum í Reykjavík. Vinirnir 15 segjast ætla sér að vera rödd einkabílsins. Sem slíkir ætla þeir sér að verja og bæta stöðu einkabílsins í íslensku samfélagi, sem er auðvitað mjög erfið. Þeir segja að þróunin sé komin af stað og hún verði ekki stöðvuð, einn bíll á mann hlýtur þá að vera markið. Þeir segja að við eigum ekki að eyða kröftum okkar í að sporna við þróun sem komin er af stað. Mig minnir að Gísli Marteinn hafi sagt eitthvað svipað, er hann kannski ein af vinunum 15?

En í alvöru talað, þá hlýtur þetta að vera brandari. Getur verið að Eggert Páll sé boðflenna í prófkjöri Sjálfstæðisflokksins í Reykjavík? Er Eggert að hæðast að Sjálfstæðismönnum og -konum? Er grínið kannski það gott að enginn fattar það, nema ég?

Ég veit það ekki, en ef Eggert er brandari þá er hann helvíti góður brandari.

Jæja það verður lítið um rekkjubrögð á heimilum Sjálfstæðismann á næstunni, að minnsta kosti þeirra sem voru viðstaddir setningaræðu Davíðs Oddsonar á landsfundinum á fimmtudaginn. Það var eins og einhver fullnægingarbylgja flæddi yfir salinn þegar hann lauk sér af. Allir fundargestir risu á fæddur og börðu saman spöðunum í einhverri óútskýrðri alsælu með fullnægingarsvip á andlitinu. Það var engu líkara en að fundargestir hefðu verið heilaþvegnir.