Elías Jón

Ég ásamt konu ársins
Ég hef valið Guðrúnu Svövu konu ársins 2006 með öllum greiddum atkvæðum.

Guðrún Svava hefur á árinu sem er að líða sýnt mér alveg einstaka þolinmæði, alúð, væntumhyggju og ást. Þá hefur hún verið mér ómetanlegur og frábær félagsskapur. Að auki er hún réttsýn, umhyggjusöm og hjartahlý manneskja í alla staði. Hún er svo sannarlega vel að titlinum komin.

Til hamingju Guðrún Svava!

Ég vil gjarnan fá að heyra viðbrögð ríkisstjórnar Íslands við aftökunni á Saddam Hussein. Ætlar hún að þaga algjörlega(þögn er sama og samþykki)? Ætlar hún að fordæma aftökuna? Eða ætlar hún kannski að gera bara eins helstu bandamenn sínir og fagna henni?

Síðast þegar ég vissi voru Íslendingar á móti dauðarefsingum. Hvað með ríkisstjórnina?

Ég las á dögunum að Vilhjálmur borgarstjóri og félagar hans séu komnir í enn einar ógöngurnar. Nú eru það lóðaúthlutanirnar sem þeir lofuðu í vor sem eru að vefjast fyrir þeim. Enn sem komið er virðast þeir ekki hafa dottið niður á „töfralausnina“ á því hvernig þeir ætla að úthluta lóðunum, a.m.k. ekki opinberlega.

Í haust varð ég vitni að samtali „innmúraðs“(eins og þeir kalla þá í Valhöll) manns úr ráðhúsinu við mann(kannaðist ekki við hann). Í samtalinu útskýrði hinn „innmúraði“ það fyrir sessunaut sínum hvernig hann gæti náð sér í lóð. Hinn „innmúraði“ mælti með því að sessunauturinn færi á fund með ákveðnum manni sem hafði mikið um lóðaúthlutanir að segja. Áður en að þeim fundi kæmi ætlaði hinn „innmúraði“ undirstynga málið aðeins.

Það skal tekið fram að samtalið fór fram á vínveitingahúsi og báðir aðilar þess höfðu rauðvínsglas við höndina. Auk þess sem ég heyrði aðeins brot af því. Þrátt fyrir þessa fyrirvara leiðir þetta samtal óneitanlega í ljós á hvaða á hvaða vafasömu slóðum Vilhjálmur og félagar hafa verið að leita að lausnum.

Hvernig er hægt að ganga algjörlega fram hjá íþróttafólki sem hefur unnið heimsmeistaratitil á árinu?

Ég fékk tölvuna til baka rétt fyrir jól. Ég lét þó fjölskykduna ganga fyrir þar til nú.

Ég óskaði auðvitað öllum gleðilegra Jóla, þó ég hafi reyndar ekki gert það á opinberan hátt, og ég vona að hafi fengið þá ósk uppfyllta. Ég hafði mig ekki í að skrifa jólakort þetta árið frekar en mörg undanfarin(enda las ég einhverstaðar að maður ætti ekki að segja frá því hvers maður óskar sér fyrr en óskin rætist). Ég þakka öllum þeim sem sendu mér slík kort og bið þá að taka því ekki illa þó að ég hafði ekki svarað þeim. Ég þakka líka öllum þeim sem sendu mér ekki jólakort, ég skil ykkur. Ég ætla þó að lofa því að skrifa jólakort fyrir næstu ár og geri það loforð að áramótaheiti mínu(eða má maður kannski ekki heldur sejga frá því?).

Jólin voru yndisleg enda fátt betra en að liggja rænulaus af ofáti í faðmi fjölskyldunnar. Bæði ég og Guðrún Svava fengum margar góðar gjafir eins og straujárn, flautuketil, hnífapör og margt fleira. Allar þessar gjafir munu koma að góðum notum og sumar hafa reyndar nú þegar gert það. Þegar maður innbyrðir óhóflegt magn af söltum mat þá fylgir því óhjákvæmilega bjúgmyndum. Ketillinn hefur því verið nauðsynlegur til að hita vatnið í græna teið sem ég hef drukkið gegn bjúgnum.

Umræða síðustu viku um vegagerð er komin út í vitleysu. Nú eru fulltrúar mismunandi landshluta farnir að metast um það hvar flestir deyi eða slasist. Þeim sem tekst að koma upp með hæstu tölurnar telja sig eiga heimtingu á því að þeirra vegur verði tvöfaldaður fyrst. Hversu firrt er það? Ég ætla að rétt að vona að menn gangi ekki lengra í þessari samkeppni. Ef öryggi á vegum væri málefni sem núverandi ríkisstjórn legði einhverja áherslu á þá stæðu þessar umræður ekki yfir. Það væri öryggi á vegunum.

***

Það sannast betur og betur að sú ákvörðun ríkisstjórnarinnar að lækka matarskattinn var vanhugsuð, illa undirbúinn og greinilega tekin í skyndi. Fyrst kom í ljós að þau höfðu ekkert hugsað út í hvaða áhrif þessi breyting hefði á áfengisverð. Nú var að koma í ljós að þau höfðu ekkert hugsað út í gosdrykkina. Er ekki lágmark að slíkar breytingar séu hugsaðir til enda áður en þær eru lagðar fram?

***

Í vikunni tjáðu fulltrúar Sjálfstæðisflokks og Framsóknarflokks sig um mikilvægi þess að reisa eins fljótt og auðið er þriggja hæða mislæg gatnamót á mótum Miklubrautar og Kringlumýrarbrautar. Tveim dögum síðar dúkka fulltrúar sömu flokka upp með þá stórgóðu hugmynd að leggja Sundabraut í jarðgöng að hluta. Í máli þeirra kom einnig fram að Sundabraut væri gríðarlega mikilvæg framkvæmd því hún myndi létta gríðarlega á öðrum umferðaræðum borgarinnar og nefndu þeir sérstaklega fyrrnefnd gatnamót. Er því nema von að ég spyrji: Er þetta fólk ekki í sambandi við sjálft sig?

***

Sjávarútvegsráðherrann er farinn til Bandaríkjanna til þess að bæta fyrir mistökin, sem ákvörðunin um að hefja hvalveiðar í atvinnuskyni var. Hingað til hefur ráðherrann ekki viljað viðurkenna að hún hafi verið mistök. Mér finnst þó einhvernvegin að þessi ferð hans sé ákveðin viðurkenning af hans hálfu. Það er bara verst að enginn vil tala við hann þarna úti.

***

Formaður og fulltrúar Samfylkingarinnar segja að allir hafi misskilið orð formannsins. Útfrá þessu má draga þá ályktun að Samfylkingarfólk tali eitthvað torskilið og áður óþekkt tungumál. Það er því best að taka ekki mark á orðum Samfylkingarfólks þegar það mælir heldur bíða í einn til tvo daga eftir þýðingunni á orðum þeirra.

***

Í Fréttablaðinu í vikunni sá ég enn eina ástæðuna fyrir því að Ísland eigi að segja sig úr NATO. Nýr yfirmaður herafla NATO var áður yfirmaður fangabúðanna í Guantanamo. Þarf ég að segja meira?

Tölvan mín er lasin, tók upp á því á besta tíma. Með hjálp Erlendar kom ég mikilvægum gögnum á öruggan stað. Tölvulæknarnir segjast ekki geta læknað tölvuna fyrr en eftir tíu daga, ástandið þar er víst verra en á Landsspítalanum. Þessi síða mun væntanlega líða ansi mikið fyrir það.

Nú eiga allir að senda tölvunni minni og tölvulæknunum góða og fallega strauma.