Skólinn er byrjaður á ný eftir jólafríið. Þegar ég labbaði inn í kaffistofuna í Aðalbyggingunni blöstu við mér fréttablöð tveggja hreyfinga af þeim þremur sem bjóða fram lista í kosningum til stúdentaráðs, Röskvu og Vöku. Þriðja hreyfingin er svo Háskólalistinn. Hér eru nefnilega ekki einstaklingskosningar eins og til stjórnar nemendafélagsins í MA, heldur er kosið um lista eins og gerist í alvöru pólitíkinni. Mér hefur skilist að starf innan hreyfinga þeirra sem bjóða fram til stúdentaráðs sé í mörgum tilfellum stökkpallur fyrir starfsvettvang í landspólitík, alla vega er hægt að rekast ansi oft á sömu nöfnin á báðum vígstöðvum.
En ég velti því fyrir mér hvort mér þyki það kostur að framtíðarstjórnmálamenn landsins starfi innan þessara hreyfinga. Að þeirri niðurstöðu kemst ég eftir að hafa lesið flest fréttablöð sem hreyfingarnar Vaka og Röskva hafa gefið út, en þær eru óneitanlega stærri og meira áberandi en Háskólalistinn sem ég hef ekki enn séð nokkur staðar.
Fréttablöðin sem um ræðir segja litlar fréttir. Þetta eru meira svona auglýsinga- og montsneplar. Þar mikla hreyfingarnar sig af verkum sínum (og láta eins og heiðurinn sé allur þeirra, og bara þeirra) eða bara því að eiga fulltrúa í ýmsum nefndum. Eflaust standa þessir fulltrúar sig vel í sínu starfi, en mér finnst ekkert merkilegt að hvor hreyfingin um sig eigi fulltrúa í nefndum sem sinna starfi sínu. Mér finnst það mjög eðlilegt og óþarfi að taka það fram í hverju einasta blaði, tvisvar (þessu er sérstaklega beint að Röskvu)!
Á forsíðu Röskvufrétta minnast Röskvuliðar Meðmælanna sem haldin voru í október til að hvetja til hærri fjárframlaga til HÍ. “Fréttin” er birt í tilefni þess að nýlega fékk HÍ aukafjárveitingu, sem er æði. Í fréttinni segir: “Eins og flestir muna stóðu Stúdentaráðsliðar Röskvu fyrir glæsilegum meðmælum í október síðastliðnum [...]“. Þarna eignar Röskva sér heiðurinn af öllum Meðmælunum og afrakstri þeirra. Vel getur verið að hugmyndin sé frá þeim komin. En persónulega fannst mér útfærsla hugmyndarinnar léleg, mætingin á meðmælin var gróflega ýkt (ég var þar, ég veit það) og síðast en ekki síst, þá voru þau haldin í nafni Stúdentaráðs. Ekki Röskvu. Ég myndi því varla monta mig af þessum meðmælum.
Það fáránlegasta sem ég rakst á í þessum sneplum var eftirfarandi:
Röskvufréttir: “Röskva hefur haldið uppi síðunni Próf.is undanfarin misseri, [...]”
Vakandi, málgang Vöku: “Hægt er að fylgjast með einkunnaskilum kennara á heimasíðunni www.prof.is sem Vökuliðinn Björn Patrick Swift á veg og vanda að”.
Af hverju segja þau bara ekki eins og er, að þau geri þetta saman? Hvaða fávitaháttur er það? Sem kjósandi krefst ég þess að mér séu veittar réttar og fullnægjandi upplýsingar, ekki bara montyfirlýsingar! Verð ég að skila auðu í kosningum til stúdentaráðs af því að tvær fylkingar láta eins og smákrakkar og ein er ósýnileg?
