Orð í tíma töluð

Ég hef nú sigrast á tveimur ritgerðum af þrem.
En nenni engan veginn að skrifa þá síðustu sem ég á að skila á morgun. Enda hefur mér ætíð þótt, og þykir enn, fjölmiðlar leiðinlegt viðfangsefni.

Að hitamálum samtímans:
Endurútgáfa 10 lítillra Negrastráka: Þeir sem að þrátt fyrir ítrekaðar ábendingar sjá ekki að bók þessi er fordómafull (og reyndar gæti ég alveg skrifað langan pistil um ósmekkleg barnaævintýri og barnaefni) eru viljandi blindir. Lúðar sem hafa reynt að snúa útúr og vilja meina að þeir sem benda á ósmekklegheitin vilji banna bækur, eru ekki svara verðir. Kannski ég kaupi hana og eigi ef ég skyldi eignast börn, svona sem kennslubók í fordómum.

Þriðji stærsti morðtólaframleiðandi heims, BAE, er með hópstyrkingarnámskeið á Hilton Nordica Hótelinu. Fegin er ég að það var ekki á Sögu, ég hefði átt erfitt með að mæta í vinnuna af prinsippástæðum. Ég held að það sé augljóst að menn hafa passað sig að enginn vissi fyrirfram af komu þeirra, til að klámráðstefnumálið endurtæki sig ekki. Enda komu fyrst fréttir af þessu í gær, á einum fréttavef.

Fréttavefur Ríkisútvarpsins, ruv.is, hefur fengið nýtt útlit. Útlitshönnuðurinn ætti að skammast sín, þetta er hræðilegt. Fyrir utan það, að nú eru allir fréttavefirnir, mbl.is, ruv.is og visir.is, bláir. Geggjað. Mér líður eins og það sé fjölbreytni og samkeppni á íslenskum fjölmiðlamarkaði. Onei. Oj bara.

Og þar með er ég farin að sökkva mér oní bækur um lýðræði og fjölmiðla. Vinsamlegast vorkennið mér.

Lögin:

Babe, I’m gonna leave you - Led Zeppelin
Fever - Eva Cassidy

Markmið næstu 6 daga: að deyja ekki úr ritgerðum.
Mér finnst það háleitt markmið.

Ef ég drepst ekki, þá verðum við fjórar stúlkur í íbúðinni minni um næstu helgi; þrjár systur og mamma. Þá verður gaman, við eldum allt draslið í frystikistunni sem ég þori ekki að prófa að elda, sofum í stafla (því annars komumst við líklega ekki fyrir, pant vera efst!) og ég hef sterkan grun um að mamma kaupi handa mér lýsi. Þau pabbi eru nefnilega búin að komast að þeirri niðurstöðu að öll mín vandamál stafi af því að ég tek ekki lýsi. Auðvitað.

Svo tekur við tilhlökkun vegna fyrirhugaðar sumarbústaðarferðar UVG-stjórnar og hins langþráða Sweeney-Todd rejúnjons um miðjan nóvember. Húúúúú, hvað það verður gaman! Ég ætla að segja brandara um uppa sem eru ekki uppi, tómatsósusölumenn og Sand-böku (”Herra Sand, hinum megin við götuna”) allt kvöldið, múhahahaha!

Fyrir þá sem ekki kannast við Sweeney Todd, þá er það leikrit um morðóðan rakara sem LMA setti upp þegar ég var 17 ára. Ég lék vændiskonu og geðsjúkling, og hafði gaman af. Kaldhæðnislega, þá lék ég svo fyrrverandi vændiskonu í hitt skiptið sem ég tók þátt í leikriti á menntaskólaárunum. Ég stefni á að taka að mér fjölbreyttari hlutverk í framtíðinni, þegar ég fer að druslast til að taka þátt í áhugaleikhúsi aftur.

Ójá, tilhlökkun mín er mikil og ég mæli eindregið með því að Norðanfólkið drífi sig suður umrædda helgi.

Lagið: Wicked Little Town - úr sönleiknum Hedwig & the Angry Inch

Hugleikur Dagsson með nýja bók - Eineygði kötturinn Kisi og leyndarmálið

“Nú er komin út ný bók eftir Hugleik Dagsson um eineygða köttinn Kisa og félaga hans.

Hver er tilgangur lífsins? Hver er lykillinn að lífshamingjunni? Hvert er leyndarmálið? Hverjum er ekki sama? Sláist í för með eineygða kettinum Kisa, Kötu kanínu og Skúla skjaldböku í þessu gebbaða ævintýri. Tekst þeim að finna leyndarmálið? Er leyndarmálið til? Aðeins þeir sem lesa þessa bók fá að vita svarið. Og líka þeir sem heyra það frá fólki sem er búið að lesa bókina. Og líka þeir sem nenna ekki að lesa alla bókina og fletta strax að endinum. Það er að segja ef svarið er á annað borð í þessari bók. Kannski er þessi bók jafn mikið plat og leyndarmálið.“

Múhahahahahaha, mig langar í þessa!

Svo mæli ég með því að allir sem ekki eru búnir að sjá söngleikinn Leg, drífi sig í Þjóðleikhúsið á fyndnasta og steiktasta leikrit sem ég hef nokkurn tíman séð.

Sem ég var að bíða eftir strætó í dag, var mér litið á flennistóra auglýsingu um frístundakort fyrir börn í Reykjavík, og af auglýsingunni mátti lesa um fjölbreytilega frístundaiðkun sem kortið gerir börnum kleift að stunda, óháð efnahag foreldra þeirra. Allt gott með það. En einhvers staðar á milli skylminga og myndlistanámskeiða rak ég augun í orðasambandið “kristilegt starf”.

Nú dettur mér ekki í hug að fara að væla yfir því. Ef börn þrá ekkert heitar en ástunda kristilegt starf en geta ekki sökum fjárhags, þá er bara fínt að frístundakortið geti reddað því. En hvað með krakka sem vilja stunda öðruvísi trúarlegt starf heldur en kristilegt en eiga ekki til þess aur? Á ekki að styðja þau?

Þá myndi kannski einhvers staðar á milli fótbolta og píanóleiks standa: “ókristileg starfsemi”.
Það væri sko skemmtilegt…

Ég mun aldrei aldrei aldrei nokkurn tíman hætta að láta það fara í taugarnar á mér, að á meðan að mannréttindi eru brotin á heyrnarlausum, laun umönnunarstétta eru til skammar, álverum er klesst niður á aðra hverja þúfu á landinu, börn búa við fátækt, fólk býr á götunni, kynbundinn launamunur stendur í stað, leitað er allra leiða til að ná auðlindunum úr sameign þjóðarinnar og ójöfnuður eykst (o.fl.), þá leggja Sjálfstæðismenn aftur og aftur fram heimskulegt frumvarp um áfengi í matvöruverslanir. Og fólk kýs þá útá þetta mikla baráttumál, sem þeir eru búnir að hafa öll tækifæri til að koma í gegn á síðastliðnum árum, en hafa ekki gert af því að það var nytsamlegt til að veiða atkvæði í kosningum. Þvílík glæsileg forgangsröðun stjórnmálamanna og kjósenda.
Ég veit ekki um neitt annað mál sem mér er meira innilegra sama um. En ég vona eiginlega að segja að þetta fari í gegn á þingi. Ég vona það vegna þess að þetta er ómerkilegur skítur sem ég nenni ekki að sjá notaðan til að atkvæðaveiða eitt árið í viðbót. Ég vil að við förum að hugsa um eitthvað sem skiptir raunverulegu fokkin máli.

Október er hafinn. Á dagskránni er:

- Eitt stykki geggjað skemmtilegur landsfundur Ungra Vinstri-grænna um næstu helgi
- Eitt stykki Finnlandsferð á ráðstefnu um Global Warming með Ingu Völu

Sem sé: snilld!
Ekki svo mikil snilld:

- Eitt stykki 40% lokapróf daginn eftir að ég kem heim frá Finnlandi
- Tvö stykki 15% ritgerðir
- Eitt stykki 20% ritgerð

Auk þess er ég að vinna öll fimmtudagskvöld og 2 sunnudaga í mánuðinum (líklega), þ.e.a.s. þær helgar sem ég er ekki á landsfundi eða í Finnlandi.

Sem sé: Fokk!