Verð á Akureyri um helgina á stjórnmálaskóla UVG. Tékkið á því ef þið eruð fyrir norðan, þetta verður skemmtó (sérstaklega djammið um kvöldið - eftir kennslu í gerð molatov-kokteila, múhahahaha…).
Ég átti alltaf eftir að blogga um hvað það er æðislegt að launaleynd sé afnumin með nýju jafnréttislögunum. Húrra fyrir því!
Ég er eitthvað guggin og grá þessa dagana. Held ég sé haldin nútímaútgáfu af heimsharmi, að ég sé sem sé niðurdregin yfir því hvað allt og allir eru vitlausir og vondir. Og nei, það tengist úrslitum júróvisjón ekki rassgat.
Var að klára Íslam með afslætti. Það var gott að lesa eitthvað vitsmunalegt varðandi skopmyndamálið umdeilda, sem í grunninn snýst ekki um málfrelsi heldur tillitssemi, þó ýmsir þursar neiti að viðurkenna það. Bókin er fróðleg og mér finnst ég hafa lært af því að lesa hana. Ég er til í að lána hana ef einhver hefur áhuga og er m.a.s. búin að merkja við bestu greinarnar ef að fólk nennir ekki að lesa þær allar.
Er að blaða núna í Photos that changed the world. Þar rekst ég á myndir úr útrýmingabúðum, af morðum, sprengingum og grátandi börnum inná milli mynda af Marilyn Monroe, Bítlunum og konunglegu brúðkaupi Díönu og Karls. Jafnvel þessar hressu myndir inná milli kæta mig ekki þar sem ég veit að myndefnin urðu síðar sjálfsmorði, sundrung, morði og skilnaði að bráð.
Djöfull er mannkynssagan þunglyndisleg.
Í gær sá ég kvikmyndina Atonement sem var tilnefnd til fjölda Óskarsverðlauna en hlaut aðeins ein, fyrir tónlist held ég. Ekki kom það mér á óvart að myndin hlyti svo rýra uppskeru á Óskarnum. Sannarlega er hún flott gerð og öll umgjörð til algerrar fyrirmyndar. Leikararnir standa sig ágætlega, en ekkert meira en það. En uppúr stendur að sagan er óttalega leiðinleg. Hún er ekki al-leiðinleg og á sína spretti, en þeir eru fáir og stuttir. Ef kvikmyndin væri ekki svona mikið augnakonfekt þá hefði ég væntanlega sofnað.
Ef þið eruð á leiðina í bíó mæli ég miklu frekar með íslensku myndinni Brúðgumanum, hún er fantaskemmtileg. Sjáið svo endilega Ívanov í leiðinni, ef það er ennþá verið að sýna það leikrit, það er algerlega þess virði.
————————————————————————————————————–
Einu sinni þegar ég var lítil stúlka, var ég eins og flestallar litlar stúlkur, júróvisjón-fan. Það hefur sem betur fer elst af mér, því ef ég væri ennþá júróvisjónfan hefði ég grátið mig í svefn yfir því hvað framlag Íslands til júróvisjón í ár er rosalega lélegt (en í staðinn er mér sem betur fer nokk sama). Ég lenti nefnilega í því (það er svo kúl þessa dagana að lenda í hlutum) að horfa á lok Laugardagslaganna þegar ég kom dauðþreytt heim úr vinnunni á laugardagskvöld og skreið uppí sófa. Ég er bara ekki frá því að þetta sé versta júróvisjónlag sem Ísland hefur valið sem framlag sitt! Og mér sýnist að júróvisjón-sérfræðingur Kommúnunnar, Hildur Edda, sé ekki sátt.
Ég komst að því fyrir nokkrum dögum að ég nenni ekki að standa á ystu nöf bjargbrúnarinnar og leita leiða til að komast yfir þegar að gjáin á milli mín og þess sem ég er að reyna að ná til er augljóslega of djúp. Og ég ætla heldur ekki að kalla mig hása til að orð mín heyrist alla leið hinum megin. Kannski sendi ég reykmerki eða friðardúfur með þau skilaboð að mér líði frábærlega mín megin. Allir eru velkomnir í heimsókn, en sjálf er ég mjög heimakær.
—————————————————————————————–
Er að lesa Íslam með afslætti og renni hýru auga í áttina að No Logo e. Naomi Klein þegar þeirri lesningu verður lokið. Á líka eftir að klára Globslization and its discontents eftir Joseph Stiglitz. Mér sýnist ég algerlega vera búin að dömpa öllum fagurbókmenntum í bili. Geymi þær fyrir sumarið.
Svo er ég að fara norður á Akureyri um næstu helgi á vinstrisinnað djamm, vúhú! Vonandi verður jafn gaman þar og í Friðarhúsinu á fimmtudaginn síðasta!
Að lokum: “varnar”málafrumvarpið er prump.
En meira um það síðar…
Mætið, þetta verður gaman!
Ég fór í MH áðan ásamt Stefáni Páls að kynna starfsemi Samtaka hernaðarandstæðinga.
Ungmennin sem við hittum þar virtust svolítið sjokkeruð þegar ég sagði þeim að útgjöld ríkisins vegna varnarmála (lesist: hermála) hafi verið 2353,2 milljónir á síðasta ári.
Ég er ekki frá því að ég sé sjokkeruð sjálf, ég var eiginlega búin að gleyma að þetta væri svona há tala þangað til að ég fletti því upp rétt fyrir fundinn.
Mér varð alla vega hugsað til Landspítalans…
Úr þessari frétt á ruv.is
“Þórunn Sveinbjarnardóttir umhverfisráðherra vill ekki tjá sig um málefni álvers í Helguvík”
Frábært…
Ég hata Valentínusardaginn.
Ekki einungis vegna þess að hann er peningaplokksdagur til að pranga inná mann loðnum bleiku drasli og vondu hjartalaga súkkulaði, heldur líka vegna þess að Valentínusardagurinn hatar mig!
Í fyrra stóð ég í sambúðarslitum á Valentínusardaginn, og fyrrverandi kærasti notaði einmitt þennan dag til að koma og hirða allt dótið sitt úr íbúðinni. Ekki það að mér þætti ekki fínt að losna við dótið hans, en mér fannst þetta nú frekar ósmekklegt.
Í ár er ég veik heima, ein, og ef ég leita vorkunnar þá hefur fólk annað hvort ekki tíma til að vorkenna mér eða segir mér bara að taka lýsi.
Foj.
Í gær sótti ég Freyju Sigrúnu Freysdóttur á leikskólann og fór með hana heim til mín.
Í morgun fann ég ískápssegul í hraðsuðukatlinum.
Ætli Freyja viti hver setti hann þangað?
Blaðamannafundurinn í Valhöll var sannarlega stórkostlegur. Villi dregur fjölmiðlafólk á asnaeyrunum og lætur þau bíða í klukkutíma til að segja þeim nákvæmlega engar fréttir. Æðislegt. Frábært líka að hann skuli skipta fréttamönnum svona niður, fyrst ljósvakamiðlar og svo blaðamenn, því ekki getur hann tekist á við alla blaðamennina eins og alvöru stjórnmálamaður. Svo toppar hann náttúrulega allt með þessu svari sínu sem hann gaf fjölmiðlamanni sem spurði hvað honum finndist um það sem sagt hefði verið í Silfri Egils, að ef hann yrði borgarstjóri væru Sjálfstæðismenn að gefa næstu kosningar:
“Það var nú margt sagt í Silfri Egils og nú ert þú væntanlega að vísa í það sem kemur mér verst, þið fréttamenn gerið það nú gjarnan!”
Villi er sennilega uppáhald allra fjölmiðlamanna í dag.
Nema ef það skyldu vera framtíðarleiðtogarnir Hanna Birna og Gísli Marteinn sem laumuðust út í gegnum kjallarann til að sleppa frá fréttamönnum.
Ætli það séu hörð viðurlög við því að brjóta þagnarbindindi Sjálfstæðisflokksins?