Orð í tíma töluð

Fleiri myndir, að þessu sinni frá ferðalagi um Austurland þvert og endilangt

Á Langanesi: Ég og Ásgeir Máni systursonur Kristjáns - Ásgeir Máni nývaknaður og ég úfin = augljóslega kodak-moment

Hestaferð á Langanesi

Við Lagarfljót

Kristján Ketill í Hallormsstaðarskógi

Seyðisfjörður - sem ég er skotin í

Hjá því sem eftir er af franska spítalanum á Fáskrúðsfirði

Hjá Jökulsárlóni

Jökulsárlón

Í Skaftafelli

Við Svartafoss

Svartifoss

Við Kirkjugólf á Kirkjubæjarklaustri

Skógarfoss

Aðrir viðkomustaðir sem eru ekki á mynd: Hérað, Egilsstaðir, Hellisheiði eystri, Vopnafjörður, Selárdalslaug, Þórshöfn, Höfn í Hornafirði og fleiri staðir (sem keyrt var í gegnum).

Ég var að heimsækja næstum alla þessa staði í fyrsta skiptið og hið fagra Austurland kom mér á ýmsan hátt á óvart. T.d. vissi ég ekki að það væru svona margir helvítis fjallvegir þar (ekki fyrir bílhrædda) og svona mikið af kamikaze-lömbum á vegunum. Og hvað er með það að ég skuli hafa verið að skrölta á malarvegi á hringveginum? Malarvegi!?! Og ég ætla ekki einu sinni að byrja á einbreiðu brúnum. Ég sæji Reykvíkinga sem berjast fyrir mislægum gatnamótum útúm allt keyra malarveg og einbreiðar brýr á hverjum degi. Samgöngubætur útá land takk fyrir.

Hér koma nokkrar myndir frá útskriftinni Sindra 17. júní á Akureyri

Sindri tók við stúdentsskírteininu

Og var geðveikt glaður

Sindri og íslenski fáninn

Við Sindri gerum grín af Þórunni af því að hún á ekki stúdentshúfu

En svo hoppuðum við öll af gleði

Með mömmu og pabba

Sindri og Amma Dedda

Við Sindri vorum geggjað hress

Ég og Kristján Ketill

Sindri og Kristján Ketill

Baldur, Gunni, Sindri og Óli tóku Barbershop-kvartett á skemmtuninni um kvöldið

Ein sæt af mér og litla bróður í lokin

Já, blogg með löngu millibili er tískan í sumar. Sérstaklega þegar að það koma næturvaktavikur.

Ég átti einstaklega ánægjulegan 17. júní á Akureyri, Sindri bróðir var að útskrifast sem stúdent af náttúrufræðibraut MA. Ég tók ofurstoltu systurina á þetta og var hálfgrenjandi frá því að ég sá hann ganga inní salinn og frammá kvöld. Yndislegt. Ég og Kristján tókum fullt af myndum; fínum myndum, fyndnum myndum, hoppimyndum, grettimyndum, væmnismyndum og krúttumyndum (aðallega af okkur sjálfum í sleik í lystigarðinum… vúhú!). Ég lofa að birta þær bráðlega (nema þessar af okkur í sleik, til að misbjóða ekki velsæmiskennd góðborgaranna sem lesa þetta blogg).

Stutt frá sagt, til hamingju Sindri! Og Steinunn, Pálmi, Ágúst, Óli, Helga, Gunni, Baldur, Steinbi, Anton, Janis, Villi, Kristín, Birna, Janni og þið hin sem ég gleymi alveg óviljandi (og elska ykkur samt). Gaman að hitta svona marga, leitt að geta ekki hitt alla sem ég ætlaði að hitta vegna tímaskorts og símavesens. Ég stefni á aðra Akureyrarferð í náinni framtíð.

Í öðrum fréttum er það helst að ég gæti skrifað langa færslu um pirring minn yfir því hvað ruv.is er orðinn lélegur og ljótur vefur mér til mikillar hrellingar. Ég vel hins vegar að gera það ekki og nýta tíma minn í eitthvað betra… eins og að skoða ekki ruv.is af því að það er ljótur og lélegur vefur sem er lengi að hlaða inn fréttum og er með ótal uppsetningarvillurm sem fer í taugarnar á mér því þá verð ég að lesa mbl.is með öllum fokking moggabloggatenglunum eða klámflenginn og tilgangslauss-slúðurs- vísi.is í staðinn. Af hverju eru allir fréttamiðlarnir á netinu svona ömurlegir?

Og þarmeð er ég flogin austur á land í útilegu.

Aðeins meira um bíladaga…

Samkvæmt RÚV komu um 300 mál til kasta lögreglu á bíladögum á Akureyri (sem er nota bene ekki enn lokið).

“Daníel Guðjónsson, yfirlögregluþjónn á Akureyri, segir að stór hópur gesta hafi hagað sér dólgslega og lögreglumenn verið í hættu”.

Mér finnst að það hefði alveg eins mátt taka það fram að almennir borgarar hafi líka verið í hættu eins og lögreglumenn. Það er alla vega það sem ég les útúr fréttum um 14 líkamsárásir (þar af ein alvarleg), 4 fíkniefnamál, yfir 40 hraðakstursmál og 3 brot á lögum um flugelda. Allt eru þetta ógnir við öryggi almennra borgara.

Ég tek það fram að ég er þó alls ekki að gera lítið úr því að lögreglumenn hafi verið í hættu. Ég vil bara vekja lesendur til umhugsunar um að það var venjulegt fólk líka.

Ég þoli ekki bíladaga á Akureyri.

- Bútar úr fréttum af visi.is, ruv.is, akureyri.net og úr Fréttablaðinu frá því í dag og síðustu 2 daga.

“Í hádegisfréttum kvaðst verslunareigandi í miðbæ Akureyrar vera mjög ósáttur við bíladaga og sagði þá snúast um fyllerí, óspektir, eiturlyfjaneyslu og leiðindi og hafa skaðleg áhrif á ímynd Akureyrar”

“Lögreglan á Akureyri býst við því að talsverður fjöldi af kærum vegna líkamsárása verði lagðar fram eftir helgina”

“Fangageymslu fylltust af fólki og mikill aðsúgur var gerður að lögreglumönnum. Hafa þeir raunar sjaldan kynnst öðru eins og munu lætin hafa verið verri en á nokkrurri verslunarmannahelgi hingað til”

“Þá var gæslumaður á tjaldstæði sleginn tvívegis í andlitið og rúður brotnar víðs vegar um bæinn auk þess sem fjöldi kvartana barst vegna spólkeppni sem frá lagði mikinn reyk og illan daun. Alls var tilkynnt um 7 líkamsárásir.”

“Á þriðja tímanum í nótt var skoteldatertu skotið lárétt yfir Ráðhústorg og beint að lögreglumönnum og öðrum sem þar voru. Mildi var að enginn slasaðist og óskar lögreglan eftir upplýsingum um þá sem þarna voru að verki. Þá virtist sem fleiri skoteldar væru í umferð og tók lögreglan m.a. rakettu af einum manni. Nokkru síðar var gerður aðsúgur að lögreglumönnum sem voru að handtaka mann og reynt að hindra handtökuna. Komu aðrir lögreglumenn til aðstoðar og þurftu þeir að beita bæði kylfum og varnarúða. Mikil ólæti voru síðan fram undir morgun”

“Þetta er annað árið í röð sem skemmtanahöld í kringum bíladaga fara úr böndunum”

Nú veit ég fullvel að einhverjum þyki Bíladagar skemmtilegt fyrirbæri og meðal þeirra er vissulega mikið af mætu fólki. Eftir sem áður þá er ólíklegt að lögreglumennirnir sem urðu fyrir aðsúg, bílaeigendurnir sem komu að bílunum sínum dælduðum eftir flöskur eða með brotnar rúður, þeir sem að eru á þessu augnabliki væntanlega í símanum við BYKO að panta nýjar rúður í stað þeirra sem einhverjir besefar brutu, bæjarbúar sem vaknaði um miðjar nætur við reykspólandi fávita á nærliggjandi plani, eða fólkið sem varð fyrir líkamsárásum, fylli þann flokk. Heldur ekki starfsmenn slysó sem að kviðu fyrir helginni sem var að líða, eða þeir Akureyringar sem einfaldlega flúðu úr bænum.

Af þessum hátíðarhöldum hefur verið gríðarlegt ónæði og um þau mikill og neikvæður fréttaflutningur sem á eftir að koma niður á Akureyrarbæ, skýrast í formi neikvæðar ímyndar. Það sem mér finnst langverst er að alltaf er reynt að splæsa þessari (já ég leyfi mér að nota gríðarlega gildishlaðið orð hér, svo mikil er óbeit mín) lágkúru saman við stúdentahátíðirnar 16. og 17. júní, að ekki sé talað um fjölskylduhátíðina á þjóðhátíðardaginn. Það persónulega pirrar mig að þessum 2 hátíðum sé troðið saman, því ég frábið mér aðra en vil ekki fyrir nokkurn mun missa af hinni.

Og þarmeð er ég farin norður, fyrst í Skagafjörð og svo alla leið á Akureyri á morgun. Vonandi verða bílabullurnar farnar heim þá.

E.S. Dagskrá Bíladaga hófst með hóprúnti um bæinn. Hóprúnti. Má ég frekar biðja um 24 tíma marathon af Stubbunum…

Söngleikurinn Spring Awakening sem ég bloggaði um í síðustu færslu rakaði inn Tony-verðlaunum á síðasta ári, og ein fyrsta upptakan sem ég heyrði og sá af þessu leikriti var upptaka af atriði úr sönleiknum á afhendingu Tony-verðlaunanna. Síðan þá hef ég hlustað nokkrum sinnum á lögin úr söngleiknum (takk Ævar) og svo hlustað aftur á atriðið sem flutt var á Tony-verðlaununum. Stutt frá að segja er ég nú búin að fatta að það er ekki næstum því sami textinn sem er sunginn. Orðin “breasts” og “fucked” sem koma fyrir í textanum höfðu til dæmis verið tekin út og á einum stað var textanum alveg breytt (það er í laginu “Bitch of living”, sem fjallar m.a. um sjálfsfróun án þess að það sé sagt berum orðum í textanum). Þetta er líklega gert vegna þess að verðlaunaafhendingunni er sjónvarpað í Bandaríkjunum og viðkvæmur bandarískur almenningur hefur náttúrulega ekki gott að því að heyra þessi dónalegu orð. Hins vegar má alveg syngja um “bitch” í sjónvarpinu. Á ég að vera glöð eða skeptísk að þetta orð verður ekki ritskoðuninni að bráð? Og ein pæling, ætli myndböndum á borð við “Candy Shop” með 50 Cent sé þá ekki heldur sjónvarpað?

Ég er með nýjan söngleik á heilanum.

Mæli með þessu

… var ég í blogghléi.

En ekki lengur.

Síðan ég bloggaði síðast hefur jörð skolfið, ísbirnir gengið á land og sjálfstæðismenn í Reykjavík komið sér saman hver á að verða borgarstjóri. Allt saman eitthvað sem enginn bjóst við að myndi gerast. Af mér sjálfri eru hins vegar engar óvæntar fréttir, ég vinn á næturvöktum á Sögu núna fyrrihluta sumars og líkar mjög vel enn sem komið er. Plön sumarsins eru í stuttu máli að þvælast sem mest um landið, útskrift á Akureyri, sveitin heima, sveitin fyrir austan, útilega með Ingu Völu og 3ja daga gönguferð með KK - og þetta er bara fyrrihluti sumars. Hörkuplan!

Af lestrarátakinu er það að frétta að það stöðvaðist tímabundið á meðan á næturvöktum stó, en ég er búin með Ljóðasafn Steins Steinarrs og Maí 68 - frásögn og mæli með þeim báðum, algerlega. Er að lesa Vefarann mikla frá Kasmír eftir Halldór Laxness núna.